طلعت السادات: «لو ماعرفناش نحمى الصناديق ما نبقاش رجالة»

عقد طلعت السادات، رئيس حزب مصر القومى، مؤتمراً انتخابياً للحزب بمدينة فوة فى كفر الشيخ، أمس الأول، خاطب خلاله الحاضرين بقوله: «اختاروا المرشحين النضاف اللى يخدموكم، أما حماية الصناديق فلو ماعرفناش نحميها ما نبقاش رجالة، وإوعى حد يمنعكم أو يحوشكم على باب اللجنة زى الشغل بتاع زمان، ومفيش تزوير ولا أونطة».
وبكى «السادات» أكثر من مرة تأثراً بحفاوة الحضور به، وأمسك جلبابه وقال: «أنا فلاح زيكم وأنا منكم، وإنتم ناس طيبين، وطلباتكم بسيطة ومش عاوزين مليارات، ومنه لله اللى سرق حلم الشباب».
وأضاف «السادات»: «الرئيس الراحل أنور السادات مات وماسابش لعياله حاجة، لدرجة إن ابنه باع بيته عندنا فى البلد، لكن الحمد لله إنه ساب ناس زيكم بتفتكره بالخير وبتترحم عليه، وكل أمنيتى فى الدنيا إنى أندفن بجوار أبى عندما أموت، وأقسم بالله دخلت مجلس الشعب دورتين وخرجت مديون وكان ممكن أعمل كتير».
وتابع «السادات»: «فى الفترة الأخيرة لغة الناس اتغيرت، وعشان واحد يطلع ويقول لو رشحنا كلب ميت أو حمار ميت الناس حتنتخبه، لأ ده عيب، وللأسف ربنا ابتلانا برئيس حكومة فاشل ومعاه جنسية أمريكية، وإحنا عاوزين رئيس جمهورية فى المرحلة المقبلة زى جمال عبدالناصر، ومينفعش حد زى أنور السادات، لأنه رجل طيب، عاوزين واحد قوى يربى عياله لأن البلد حتضيع».

» الديمقراطية ليست «الصناديق» فقط